Vígsla Heiðarborgar - mikilvægur áfangi í Hvalfjarðarsveit

Nýr og mikilvægur áfangi í Hvalfjarðarsveit

Laugardaginn 3. október verður ánægjulegur og vonandi eftirminnilegur dagur í Hvalfjarðarsveit þegar nýtt íþróttahús og verðandi samfélagsmiðstöð verður formlega vígt. Af því tilefni vil ég hvetja íbúa Hvalfjarðarsveitar og aðra vini og velunnara sveitarfélagsins til að fjölmenna og fagna þessum mikilvæga áfanga með okkur.

Með tilkomu mannvirkisins verður stórt skref stigið í uppbyggingu aðstöðu til íþrótta, hreyfingar og samfélagsstarfs í sveitarfélaginu. Hér er ekki aðeins um að ræða nýtt hús heldur fjárfestingu í samfélaginu sjálfu – í börnum og ungmennum, fjölskyldum, félagsstarfi, lýðheilsu og auknum tækifærum til samveru. Slík aðstaða skiptir miklu fyrir lífsgæði íbúa og styrkir Hvalfjarðarsveit enn frekar sem góðan stað til að búa, starfa og njóta.

Á þessum tímamótum er jafnframt bæði rétt og mikilvægt að horfa til þeirra sem lögðu grunninn að framkvæmdinni. Fyrri sveitarstjórn og þáverandi sveitarstjóri tóku á síðasta kjörtímabili ákvörðun um að ráðast í þessa metnaðarfullu uppbyggingu og fylgdu verkefninu úr hlaði. Fyrir þá framsýni, metnað og ákvörðun ber að þakka.

Sömuleiðis vil ég færa mannvirkja- og framkvæmdanefnd Hvalfjarðarsveitar og verkefnastjóra sérstakar þakkir fyrir þeirra mikilvæga framlag og eftirfylgni með verkefninu. Starfsfólk Hvalfjarðarsveitar á einnig miklar þakkir skildar fyrir þá miklu vinnu sem lögð hefur verið í undirbúning, framkvæmd og fjölmörg úrlausnarefni sem óhjákvæmilega fylgja verkefni af þessari stærðargráðu. Þá hafa verktakar, hönnuðir og aðrir samstarfsaðilar lagt sitt af mörkum til þess að þessi metnaðarfulla framkvæmd yrði að veruleika.

Stór verkefni verða ekki að veruleika á einni nóttu. Þau byggjast á ákvörðunum, framsýni og samstarfi fjölmargra aðila yfir lengri tíma. Vígsla mannvirkisins er því góður vitnisburður um hvað hægt er að gera þegar kraftar eru sameinaðir og sameiginleg framtíðarsýn höfð að leiðarljósi.

Nú er komið að því að samfélagið taki mannvirkið í sína þjónustu og gefi því líf. Raunverulegt verðmæti þess mun ekki aðeins mælast í fermetrum eða fjárfestingu heldur fyrst og fremst í þeirri starfsemi, samveru og gleði sem þar mun eiga sér stað á komandi árum.

Ég hvet því þá íbúa sem tök hafa á, fjölskyldur, félagasamtök og alla velunnara Hvalfjarðarsveitar til að taka daginn frá og mæta til vígslunnar laugardaginn 3. október. Við skulum fagna saman þessum mikilvæga áfanga í uppbyggingu samfélagsins okkar.

Verið öll hjartanlega velkomin – sjáumst við vígsluna!

Björn Bjarki Þorsteinsson
sveitarstjóri Hvalfjarðarsveitar