Þjónusta við öryrkja

Hvalfjarðarsveit veitir íbúum fjölbreytta þjónustu á ýmsum sviðum um flesta þá þætti er lúta að daglegu lífi fólksins í bænum. Hér má nálgast upplýsingar um ýmislegt er snýr að þjónustu við öryrkja, s.s. félagsstarf, félagslega aðstoð, félagslega ráðgjöf, upplýsingar um málefni fatlaðra, upplýsingar um endurhæfingu og atvinnu með stuðningi.

Félagsstarf

Akraneskaupstaður og Hvalfjarðarsveit standa fyrir félagsstarfi að Kirkjubraut 40, 3. hæð fyrir aldraða og öryrkja. Öryrkjar eru sérstaklega boðnir velkomnir á þriðjudögum og föstudögum. Almenn handavinna er alla þriðjudaga og leir og gler til skiptis. Einnig mósaík, skartgripagerð og fleira sem er auglýst sérstaklega. Á föstudögum er opið hús og fyrsta föstudag í mánuði er bingó. Á fésbókarsíðu félagsstarfsins er starfið kynnt reglulega. Hér er aðgangur að síðunni.

Endurhæfingarhúsið Hver

Á vegum endurhæfingarhússins Hver er einnig félagsstarf en öryrkjar eru velkomnir þangað á mánudögum, þriðjudögum, miðvikudögum og fimmtudögum frá kl. 9-15.30 og á föstudögum kl. 10-14.00. Þar er hægt að velja sér tómstundaverkefni, fara í tölvu, lesa blöðin og fá sér kaffi í notalegu umhverfi. Endurhæfingarhúsið Hver er staðsett á Suðurgötu 57, 3. hæð, við Akratorg. Frekari upplýsingar veitir forstöðumaður Endurhæfingarhússins, Thelma Hrund Sigurbjörnsdóttir bæði í tölvupósti á netfangið thelma.hrund.sigurbjornsdottir@akranes.is og í síma 431 2040.