Velferðar- og fræðslunefnd

Trúnaðarmál tekin fyrir.

Beiðni um viðauka við fjárhagsáætlun á deild 5911 - Fjárhagsaðstoð fyrir árið 2026. Þörf fyrir fjárhagsaðstoð hefur reynst meiri en áætlað var og því er fyrirséð að fjárheimildir deildarinnar dugi ekki til að mæta útgjöldum ársins.

Markmið og hlutverk Íþrótta- og æskulýðssjóðs Hvalfjarðarsveitar er að styðja við íþrótta- og æskulýðsmál í Hvalfjarðarsveit.



Alls bárust níu umsóknir í Íþrótta- og æskulýðssjóð Hvalfjarðarsveitar.

Starfsreglur ungmennaráðs Hvalfjarðarsveitar uppfærðar með hliðsjón af barnvænu sjónarmiði.

Lagt er fram til umfjöllunar tillaga um uppbyggingu og rekstur sameiginlegrar skammtímadvalar fyrir börn og ungmenni með fötlun og umfangsmiklar stuðningsþarfir á Vesturlandi. Verkefnið er unnið í samstarfi sveitarfélaga á Vesturlandi og Þroskahjálpar á Vesturlandi og miðar að því að tryggja jafnt aðgengi að lögbundinni þjónustu óháð búsetu.



Gert er ráð fyrir að skammtímadvölin starfi í húsnæðinu að Holti í Borgarbyggð, rekin af sjálfseignarstofnun í atvinnurekstri. Lagt er til að sveitarfélög á Vesturlandi stofni sjálfseignarstofnunina, en hún sjái um rekstur þjónustunnar og leigi fasteignina að Holti. Fyrir liggur ítarlegt minnisblað ásamt fylgigögnum: Drög að samþykktum fyrir skammtímadvöl Vesturlands ses., Tillaga að rekstrarmódeli og fjárhagsáætlun, þarfagreining á húsnæði Holts og drög að leigusamningi.



Ráðum sveitarfélaganna er ætlað að taka afstöðu til

Val á sviðsmynd: Hvort stefnt skuli að sviðsmynd 1 eða 2 við fulla opnun, eða hvort útfærslan eigi að vera með öðrum hætti.

Verkefnastjórn leggur til að sviðsmynd 1 verði fylgt fram að áramótum og sviðsmynd 2, eða full opnun, verði langtímamarkmiðið.

Útfærsla tekjumódels: Val milli valkosts A (skipt eftir íbúafjölda) og valkosts B (50% fastur kostnaður eftir íbúafjölda og 50% breytilegur eftir keyptum sólarhringum).

Verkefnastjórn leggur til að valkosti B verði fylgt, á grundvelli jafnræðissjónarmiða barna á svæðinu.

Fjöldi fulltrúa í fulltrúaráði: Stofnaðilar þurfa að taka afstöðu til þess hve margir fulltrúar eigi að sitja í fulltrúaráði og hvernig tilnefningu þeirra verði háttað.

Verkefnastjórn leggur til að einn fulltrúi, frá hverju sveitarfélagi, komi úr röðum notendaráðs.

Framlag stofnenda: Ákvörðun um skiptingu stofnfjár milli sveitarfélaga.

Verkefnastjórn leggur til jafna skiptingu milli sveitarfélaga.

Tímasetning stofnunar opnunar: Staðfesting á að formleg skráning fari fram tímanlega fyrir áformaða opnun haustið 2026.

Úthlutun kennslustunda til skólastarfs skólaárið 2026-2027.

Unnið hefur verið að undirbúningi að heildarskipulagi á uppbyggingu í Heiðarborg sem samfélagsmiðstöð fyrir íbúa Hvalfjarðarsveitar. Í þeirri vinnu hefur verið horft til aukins aðgengis, opnunar og fjölbreyttrar nýtingar hússins fyrir ólíka aldurshópa.



Nýtt og bætt húsnæði Heiðarborgar verður tekið í gagnið haustið 2026. Taka þarf afstöðu til opnunartíma, mönnunar og stjórnunar á Heiðarborg.

Beiðni um viðauka við fjárhagsáætlun Heiðarskóla fyrir árið 2026.

Félags- og húsnæðismálaráðuneytið hefur uppfært leiðbeiningar um sérstakan húsnæðisstuðning og gert breytingar á viðmiðunarfjárhæðum vegna mats á áhrifum tekna og vegna mats á áhrifum eigna. Fjárhæðir vegna mats á áhrifum tekna hafa verið hækkaðar um 6,5% frá síðustu útgáfu leiðbeininganna (júlí 2025) og er sú hækkun í samræmi við þær breytingar sem tóku gildi um síðustu áramót á fjárhæðum húsnæðisbóta. Að baki þeirri hækkun eru breytingar sem gerðar hafa verið á fjárhæðum í almannatryggingakerfinu, m.a. vegna innleiðingar á nýju örorku- og endurhæfingarkerfi og að teknu tilliti til orlofs- og desemberuppbóta.



Þá er viðmiðunarfjárhæð um áhrif eigna færð til samræmis við þá fjárhæð sem reiknað er með í húsnæðisbótakerfinu, þ.e. 13,9 m.kr. frá og með 1. janúar 2026. Byggist breytingin á því að sömu viðmið eigi að gilda í þessu efni um opinberan húsnæðisstuðning, enda standi rök ekki til annars en að viðtakendur sérstaks húsnæðisstuðnings séu almennt í jafnmikilli þörf og aðrir á leigumarkaði að geta safnað sér fyrir útborgun til kaupa á hóflegri fyrstu eign.



Drög að uppfærðum reglum um sérstakan húsnæðisstuðning í Hvalfjarðarsveit út frá nýjum leiðbeiningum frá Félag- og húsnæðismálaráðuneytinu.

Uppfærðar starfsreglur vinnuskólans lagðar fram.

Drög að breytingum um reglur um garðslátt. Helstu breytingar eru að skilgreina betur hverjir eiga rétt á garðslætti, fjöldi slátta yfir sumartímann, ekki verður hægt að óska eftir slætti á frístundalóðum, breytt gjaldskrá út frá stærð garðsins og fast komugjald. Skilgreina betur reglur um niðurgreiðslu á garðslætti.

Lagðar fram fundargerðir Samráðshóps stjórnenda í Velferðarþjónustu á Vesturlandi.

Fréttir úr skólastarfinu kynntar.

Helstu niðurstöður úr könnun um starfsánægju starfsmanna leiks- og grunnskóla Hvalfjarðarsveitar.

Stöðugildaþörf í Skýjaborg skólaárið 2026-2027 til kynningar.

Skipulag vinnuskóla 2026 til kynningar.

Til kynningar var fundargerð stjórnar Höfða nr. 170. Til kynninga eru fyrirhuguð stækkun á Höfða.

Til kynninga eru niðurstöður á skólapúls foreldrakönnun hjá bæði leik- og grunnskóla Hvalfjarðarsveitar.

Lagt fram til kynningar verklagsreglum barnaverndarþjónustu Vesturlands varðandi eftirlit með börnum í fóstri. Verklagsreglur þessar um eftirlit með börnum í fóstri byggja á barnaverndarlögum nr. 80/2002, reglugerð um fóstur nr. 804/2004 og handbók um vinnslu barnaverndarmála frá Barna- og fjölskyldustofu. Einnig er byggt á samning Sameinuðu þjóðanna um réttindi barna. Verklagsreglurnar taka mið af réttindum barns, faglegum viðmiðum og þeirri meginreglu að hagsmunir barns skuli ávallt hafðir að leiðarljósi. Þær gilda um eftirlit með öllum börnum sem Barnaverndarþjónustan hefur ráðstafað í fóstur, óháð því hvar fósturheimili er staðsett. Þær taka til undirbúnings eftirlits, framkvæmdar heimsókna, samtals við barn, skráningar, faglegs mats, viðbragða við áhyggjum og endurskoðunar fósturráðstöfunar þegar þess gerist þörf.

Til kynningar 19. fundur ungmennaráðs.

Við umdirbúning á stofnun barnaverndarþjónustu Vesturlands hefur verið komið á fót sameiginlegri bakvakt fyrir Borgarbyggð, Hvalfjarðarsveit og Byggðasamlag Snæfellinga. Frá og með 1. maí 2025 hefur verið rekin sameiginleg bakvakt fyrir öll þessi sveitarfélög og er nú til endurskoðunar. Á 170. fundi Velferðarnefnar Borgarbyggðar var bókað "Velferðarnefnd telur nauðsynlegt að greiðslur vegna bakvakta hjá barnaverndarþjónustu Vesturlands taki mið af kjarasamningum, af því gefnu að öll þau sveitarfélög er standa að þjónustunni samþykki slíkar breytingar". Málinu var vísað til Byggðarráðs til afgreiðslu og hefur sveitastjóra Borgarbyggðar verið falið að fullvinna kostnaðarmat á þeim tillögum sem lagðar eru fram.

Sveitarfélagið vinnur að innleiðingu á Barnasáttmála Sameinuðu þjóðanna með það að markmiði að verða Barnvænt sveitarfélag. Aðgerðaáætlun hefur verið samþykkt af sveitarstjórn og kynnt af ungmennaráði fyrir öllum nemendum í Heiðarskóli. Unnið hefur verið að þeim aðgerðum sem þar koma fram og stefnir í að sveitarfélagið fái viðurkenningu sem barnvænt sveitarfélag, á 20 ára afmælisdegi sveitarfélagsins, þann 1 júní 2026.